SKÝRSLAN: Langþráður Haukasigur
Hvað réði úrslitum?
Haukaliðið mætti einbeitt til leiks, ákveðið í að komast aftur á sigurbraut eftir vonbrigðaúrslit að undanförnu. Það var aðeins eitt mark skorað í fyrri hálfleik og bæði lið tæknilega séð inni í leiknum. Í síðari hálfleik var hinsvegar aldrei spurning hvert stefndi. Haukakonum tókst að láta boltann ganga virkilega vel á milli manna og Grindavíkurkonur voru meira og minna í eltingaleik.
Bestu leikmenn
1. Sæunn Björnsdóttir
Baráttan hjá Sæunni var til fyrirmyndar og mikilvægur hlekkur í því að Haukum tókst að taka yfir miðsvæðið í leiknum. Hún átti auk þess stoðsendingu í öðru marki liðsins.
2. Sierra Marie Lelii
Var mjög hættuleg á vinstri vængnum hjá Haukum. Bjó til þónokkur færi fyrir liðsfélagana og lagði upp tvö mörk.
Atvikið
Varamaðurinn Hildur Karítas Gunnarsdóttir er að koma til baka eftir krossbandameiðsli. Hún nýtti mínúturnar sínar vel í dag og skoraði tvö mörk á þeim 20 mínútum sem hún spilaði. Ánægjulegt að sjá hana byrja að skora aftur.
Hvað þýða úrslitin?
Haukar komast úr fallsæti og upp í 7. sæti. Eru komnar með 9 stig. Grindavík er áfram með 11 stig og í 6. sæti deildarinnar.
Vondur dagur
Nicole Maher náði sér aldrei á strik á kantinum hjá Grindavík. Þessi eldfljóti leikmaður var í stífri gæslu hjá hinni ungu Erlu Sól Vigfúsdóttur og var skipt útaf eftir klukkustundarleik.
Dómarinn - 7
Heilt yfir fínt hjá tríóinu. Steinar sleppti líklega aukaspyrnu sem Grindavík átti að fá á hættulegum stað en þar fyrir utan voru vafaatriðin hvorki mörg né stór og skipta litlu máli þegar upp er staðið.