SKÝRSLAN: Selfoss í sögubækurnar
Hvað réði úrslitum?
Leikurinn var kaflaskiptur og skiptust liðin á að stjórna. Það þurfti að sjálfsögðu framlengingu til þess að skera úr um sigurvegara en þegar líða fór á hana fór að draga af leikmönnum og mistökin urðu fleiri. Þóra Jónsdóttir tók málin í sínar hendur og skoraði sigurmark Selfoss í uppbótartíma.
Bestu leikmenn
1. Karitas Tómasdóttir
Það fór ekkert framhjá Karitas á miðjunni í dag. Stórbrotin frammistaða hjá Karitas. Vann alla skítavinnuna og braut niður margar sóknir KR.
2. Hólmfríður Magnúsdóttir
Jafnar leikinn fyrir Selfyssinga með geggjuðu einstaklingsframtaki. KR lagði áherslu á að stöðva hana en það var ekki að sjá. Lék sér oft á tíðum að varnarmönnum KR.
Atvikið
Þóra Jónsdóttir kemur inná sem varamaður í framlengingunni og skorar markið sem að tryggir liðinu fyrsta bikartitil í sögu Selfoss. Gæsahúðarmóment.
Hvað þýða úrslitin?
Selfoss skráir nafn sitt á spjöld sögunnar. Fyrsti bikarmeistaratitillinn staðreynd og það er spurning hvort að þeir verði fleiri á næstu árum.
Vondur dagur
KR varð fyrir miklu áfalli í fyrri hálfleik þegar Lilja Dögg Valþórsdóttir þurfti að yfirgefa völlinn vegna höfuðmeiðsla. Leiðinlegt að vera komin alla leið í úrslitaleik með liðið sitt og geta svo ekki spilað nema rúman hálftíma. Þess vegna fær Lilja vondan dag.
Dómarinn - 9,0
Egill Arnar og hans menn stóðust prófið í dag og gott betur. Ekkert hægt að setja út á frammistöðu dómaranna.