SKÝRSLAN: Frábær Magnasigur á Grenivík
Hvað réði úrslitum?
Seinni hálfleikur var eign Magna. Þar taldi stórt að Alejandro Zambrano Martin fékk rautt spjald í lok fyrri hálfleiks. Magni mætti miklu kraftmeiri til leiks í síðari hálfleik og skoruðu þrjú mörk. Kian Williams og Louis Wardle sýndu gæði sín í leiknum og komust báðir á blað.
Bestu leikmenn
1. Kian Paul James Williams
Var mjög sprækur á vinstri kantinum og skoraði glæsilegt mark úr langskoti.
2. Louis Aaron Wardle
Stýrði miðju Magna eins og herforingi og kláraði leikinn fyrir heimamenn þegar hann skoraði af harðfylgi.
Atvikið
Rauða spjadið. Alejandro sýndi afar leikræna tilburði þegar hann reyndi að næla í vítaspyrnu fyrir Aftureldingu á 44. mínútu. Hann skildi gestina eftir með brothætta 1-0 forystu og heilan hálfleik eftir á klukkunni. Þetta taldi stórt, því að Magni voru miklu betri aðilinn í seinni hálfleik.
Hvað þýða úrslitin?
Magni stjórnar nú örlögum sínum, í fyrsta skipti í heillangan tíma. Þeir eru með 16 stig í 10. sætinu og spila mikilvægan leik við Njarðvík í fallbaráttuslag í næstu umferð. Afturelding eru sæti fyrir ofan Magna með 17 stig. Þeir eiga Hauka í næstu umferð og sigur í þeim leik gæti talið ansi stórt í haust.
Vondur dagur
Alejandro Zambrano Martin gerði sig sekan um dómgreindarleysi þegar hann fékk tvö gul með skömmu millibili. Arnar Þór Stefánsson hafði engan húmor fyrir leiklistarhæfileikum Alejandro og sendi hann í sturtu.
Dómarinn - 7
Var með stóru ákvarðanirnar réttar og hafði ágæt tök á leiknum.