SKÝRSLAN: FH féll á þriðja prófinu og Augnablik heldur sér uppi
Hvað réði úrslitum?
Það var mikið undir hjá báðum liðum. FH þurfti sigur til að tryggja sig upp um deild og Augnablik þurfti að minnsta kosti stig til að staðfesta áframhaldandi veru sína í Inkasso-deildinni. Heimakonur byrjuðu af krafti en andstæðingarnir efldust á meðan mark númer tvö lét bíða eftir sér. Augnablik var svo mun betra liðið lengst af í síðari hálfleik. Spilaði áhyggjulaust á meðan stressuðum FH-ingum gekk illa að finna sinn takt. Það lifnaði þó aðeins yfir þeim í blálokin og á leiknum og þeim tókst að finna mikilvægt jöfnunarmark. Stigið þýðir að Augnablik spilar áfram í Inkasso 2020 en leikmenn liðsins voru ekki síður svekktar en FH-konur með að hafa ekki tekið öll stigin sem í boði voru.
Bestu leikmenn
1. Telma Ívarsdóttir
Telma átti nokkrar hrikalega góðar vörslur í leiknum og var öryggið upp málað.
2. Ásta Árnadóttir
Reynslan er dýrmæt og það sást vel í leik Ástu Árnadóttur í dag. Var gríðarlega öflug í varnarlínu Augnabliks auk þess sem hún kom að fyrra marki liðsins og skoraði það síðara.
Atvikið
Tveimur mínútum eftir að FH náði forystunni átti Telma Ívarsdóttir, markvörður Augnabliks, magnaða vörslu. Hún kom þannig í veg fyrir að FH kæmist í 2-0 og það er óhætt að segja að leikurinn hefði spilast öðruvísi ef svo hefði orðið.
Hvað þýða úrslitin?
Augnablik tryggir áframhaldandi veru í Inkasso. FH-ingar halda áfram að hiksta á lokasprettinum. Liðið hefur haft þrjá leiki til að tryggja sig upp um deild en gengur bölvanlega að klára dæmið. Þær þurfa að sækja stig í Mosó í lokaumferðinni til að ljúka ætlunarverkinu.
Vondur dagur
Það var hrikalegt að horfa upp á FH-liðið bogna undan pressunni í seinni hálfleik. Leikmönnum gekk illa að tengja saman sendingar og liðið leit út eins og hauslaus her á köflum. Svona vel mannað lið á að gera miklu, miklu betur.
Dómarinn - 6,5
Tríóið var með stóru atriðin á hreinu. Ég var ekki alltaf sammála þeim með þau litlu en heilt yfir höfðu þau ágætis tök á leiknum.