SKÝRSLAN: Markasúpa í Garðabænum
Hvað réði úrslitum?
Stjarnan byrjaði leikinn af miklum krafti og komust yfir á 3. mínútu leiksins. Þær voru heilt yfir betri fyrsta korterið en þá vöknuðu Blikarnir til lífsins og jöfnuðu leikinn á 18. mínútu. Eftir það var leikurinn kaflaskiptur þar sem liðin skiptust á að sækja. Bæði mörk fengu á sig ódýr mörk en jafntefli sennilega bara sanngjörn niðurstaða.
Bestu leikmenn
1. Gyða Kristín Gunnarsdóttir (Stjarnan)
Frábær leikur hjá Gyðu. Var allt í öllu í Stjörnuliðinu, skoraði tvö mörk og var nálægt því að ná þrennunni þegar hún átti skot af löngu færi í opið mark en setti boltann í utanverða stöngina.
2. Karítas Tómasdóttir (Breiðablik)
Karítas stendur alltaf fyrir sínu og er tilbúin að berjast fyrir liðið. Hún spilaði í miðverði eftir að Selma Sól fékk rautt og stoppaði nokkrar sóknir. Hún bjó líka til þriðja mark Blika þegar hún átti sprett með boltann upp allan völlinn.
Atvikið
Þetta var mjög fjörugur leikur og erfitt að taka eitt atvik út fyrir sviga. Langar að segja skotið sem Gyða átti nánast strax eftir að hún skoraði vítið. Telma var í einhverri skógarferð, karkið autt og Gyða tekur skot af löngu færi í opið mark en setur hann í utanverða stöngina. Hefði komið Stjörnunni yfir, náð þrennunni og skorað tvö mörk á 2 mínútum. Ef og hefði...
Hvað þýða úrslitin?
Liðin halda sínum stað í töflunni, Stjarnan áfram í 5. sæti og Breiðablik í 2. sæti.
Vondur dagur
Varnarlína Breiðabliks hefur átt betri dag. Voru ekki nógu samstíga á stórum köflum, en aftur á móti voru þær að breyta til og færa leikmenn enda mikið leikjaálag vegna Meistaradeildarinnar.
Dómarinn - 7
Ágætlega dæmt. Rauða spjaldið og vítið virðist hafa verið hárréttur dómur en spurning með einhverjar rangstöður.


