SKÝRSLAN: Fyrri hálfleikur varð Fram að falli
Hvað réði úrslitum?
Taugaspenna? Leikmenn Fram virtust ekki alveg ná andanum á kafla í fyrri hálfleik og gáfu gestunum úr Vesturbæ ódýr mörk. Tökum þó ekkert af KR sem þurfti að nýta sín færi en það boðar aldrei gott að bjóða liði eins og KR forgjöf
Bestu leikmenn
1. Atli Sigurjónsson
Tvær stoðendingar hjá Atla í dag sem lét vinstri bakvörð Fram líta illa út oft á tíðum í fyrri hálfleik.
2. Beitir Ólafsson
Markmaður í liði sem vinnur 4-1 er kannski ekki augljóst val en Beitir átti nokkrar stórgóðar vörslur sem komu í veg fyrir að Fram minnkaði munin í 3-2 þegar skammt lifði leiks. Kórónaði svo leik sinn með vítavörslu í lokin.
Atvikið
Tvöföld varsla Beitis þegar 10 mínútur lifðu leiks, fyrst skot frá vítateig frá Indriða og strax í kjölfarið frá Jannik Pohl af mjög stuttu færi er sá danski hirti frákastið.
Hvað þýða úrslitin?
KR sest með Blikum á topp deildarinnar með 3 stig og 3 mörk í plús en Fram með Keflavík á botninum með 0 stig og 3 mörk í mínus.
Vondur dagur
Aðdáendur Fram fylktu liði á völlinn með von í brjósti um gott kvöld og sigur á KR. Brúnin var orðin heldur þung eftir 30 mínútna leik og heyrði ég menn tala um að taka bara strætó heim í hálfleik.
Dómarinn - 6,5
Smá vorbragur á Pétri í kvöld og ekkert alltaf sem ég var endilega sammála honum. Staðreyndin er nú samt sú að hann er dómari í efstu deild en ekki ég.