SKÝRSLAN: Ekki fallegt en árangursríkt í fyrsta sigri Aftureldingar
Hvað réði úrslitum?
Vilji og barátta, gestirnir voru komnir til Keflavíkur með það að markmiði að berjast með kjafti og klóm fyrir stigunum þremur. Í 75 mínútur voru þær ofan á í öllum návígjum úti á velli og unnu flesta seinni bolta líka. Voru svo grimmar í teignum á réttum augnablikum og uppskáru sanngjarnan sigur.
Bestu leikmenn
1. Christina Clara Settles
Gríðarlega öflug í vörninni í leiknum og skoraði gott mark eftir horn. Tók mig reyndar talsvert langan tíma að finna út hver hún var í leiknum en hún lék ekki í sama númeri og hún var skráð með á skýrslu.
2. Auður Sveinbjörnsdóttir Scheving
Lykilvörslur í upphafi leiks þegar Keflavík sótti á gestina. Þess utan var hún örugg í öllum sínum aðgerðum og steig upp þegar á þurfti að halda.
Atvikið
Jöfnunarmark Aftureldingar er ákveðin vendipunktur í leiknum. Veitti mikilli aukaorku inn í lið Aftureldingar og gaf þeim þetta extra sem þurfti til þess að sækja annað mark og klára leikinn.
Hvað þýða úrslitin?
Afturelding er enn í 9.sæti deildarinnar en nú með þrjú stig í stað núll. Keflavík situr í því fjórða með sex stig.
Vondur dagur
Ana Paula Santos Silva var ekki alveg að finna sig í dag, sýndi okkur glefsur af hæfileikum sínum hér og þar í leiknum en náði aldrei almennilegum takti. Mikið til þó vegna þess að varnar og miðjumenn Aftureldingar höfðu á henni góðar gætur.
Dómarinn - 8
Stóru atriðin rétt, vel dæmdur leikur heilt yfir og ekkert hægt að kvarta yfir frammistöðu Kristins í dag.