SKÝRSLAN: Allir svekktir eftir opnunarpartíið
Hvað réði úrslitum?
Opnunarleikur nýja Framvallarins í Úlfarsárdal var galopinn í allar áttir. Nóg af mistökum og möguleikum, umdeildum atvikum og alls konar dóti. Afskaplega skemmtilegur leikur en við lokaflautið voru bæði lið súr og svekkt.
Bestu leikmenn
1. Guðmundur Magnússon - Fram
Hann hættir ekki. Rosalegt skrið á manninum. Þrenna í fyrsta leik á nýja vellinum.
2. Andri Rúnar Bjarnason - ÍBV
Stöngin kom í veg fyrir að Andri næði að herma eftir Gumma Magg og skora þrennu.
Atvikið
Það var gríðarlegt magn af áhugaverðum atvikum í þessum leik. Ég vel hinsvegar vítið sem ÍBV fékk strax á fyrstu mínútu. Alvöru tuska í andlitið á Frömurum sem voru mættir með blöðrur og andlitsmálningu í nýju stúkuna.
Hvað þýða úrslitin?
Framarar halda áfram að hleypa inn of mörgum mörkum og gengur oft erfiðlega að sigla sigrunum í hús. Eyjamenn eru enn án sigurs í botnsætinu.
Vondur dagur
Þó skemmtanagildið hafi verið mikið þá fengu aðdáendur af öguðum varnarleik ekki mikið fyrir sinn snúð. Varnarleikur beggja liða var alls ekki sérstakur og mistökin voru mörg. Markverðir beggja liða og varnir þeirra fá falleinkunn.
Dómarinn - 4,5
Teymið í heild fær þessa einkunn. Klaufaleg atburðarás í aðdragandanum að öðru marki ÍBV. Stóru vítaákvarðanirnar voru allar réttar held ég en nokkrir aðrir dómarar orkuðu tvímælis.