SKÝRSLAN: Markaregn á blautum Þórsvellinum
Hvað réði úrslitum?
Þórsarar gerðu nánast bara út um leikinn á fyrstu 10 mínútum leiksins en staðan var orðin 2-0 eftir 8. mínútna leik og svo fá Þróttarar á sig vítaspyrnu og þriðja markið komið eftir rúmlega hálftíma leik.
Bestu leikmenn
1. Alexander Már Þorláksson
Rosalega erfitt að velja menn leiksins, fremstu menn voru allir frábærir. Alexander lagði grunninn af sigrinum með góðu marki og svo frábært spil milli hans og Bjarna Guðjóns í öðru marki liðsins.
2. Bjarni Guðjón Brynjólfsson
Var öflugur í liði Þórs í dag og skoraði tvö góð mörk. Harley Willard og Ion voru einnig virkilega flottir svo einhverjir séu nefndir.
Atvikið
Alexander Már Þorláksson kom Þórsurum á bragðið í sínum fyrsta leik með því að skora fyrsta markið eftir aðeins rúmlega fimm mínútna leik, setti boltann í opið markið.
Hvað þýða úrslitin?
Lífsnauðsynlegur sigur Þórsara sem hefðu misst Þróttara uppfyrir sig með tapi í kvöld. Í staðinn eru Þróttarar enn á botninum með aðeins tvö stig. Þór er áfram í sætinu fyrir ofan fallsæti, fjórum stigum á undan KV sem koma í heimsókn til Akureyrar næstkomandi þriðjudag.
Vondur dagur
Þróttarar voru arfaslakir í kvöld. Vissulega brekka að fá á sig tvö mörk á fyrstu tíu mínútunum en það var ekkert að frétta hjá þeim.
Dómarinn - 7
Það var ekkert brjálað að gera hjá honum. Það voru nokkrar harðar tæklingar, væntanlega vegna aðstæðna, ansi blautur völlurinn. Dómari leiksins tók bara rétt á því.