SKÝRSLAN: KA vinnur á útivelli eftir að Daníel Laxdal sá rautt
Hvað réði úrslitum?
Það var ákveðið jafnræði lengi í leiknum en KA menn náðu að klára sín færi. Svo breytist leikurinn töluvert eftir að Stjörnumenn verða manni færri þó svo að þeir hafi spilað nokkuð vel eftir það líka.
Bestu leikmenn
1. Elfar Árni Aðalsteinsson (KA)
Elfar skorar fyrsta mark leiksins og leiðir línuna almennt mjög vel. Hann skilaði líka gríðarlegri varnarvinnu þar sem hann var oft að koma mjög djúpt niður og vinna boltan aftur fyrir sitt lið.
2. Dusan Brkovic (KA)
Dusan var öflugur í vörn KA eins og oftast en það voru nokkrir sem komu til greina í þennan dálk. Dusan fær þetta aðallega útaf stoðsendingunni sem hann á fyrir markið sem Jakob skorar. Sendingin var alveg hreint mögnuð.
Atvikið
Rauða spjaldið á Daníel Laxdal og allt í kringum það var algjör farsi. Þórarinn ýtir Ásgeir í jörðina eftir að hafa brotið á honum og þegar Elfar ætlar að fara vernda sinn mann snöggreyðist Daníel og grípur um hálsinn á Elfari og ýtir honum niður í jörðina.
Hvað þýða úrslitin?
Stjarnan situr enn í 6. sæti deildarinnar með 34 stig.
KA fer 3 stigum fyrir ofan Víkinga sem eiga einn leik til góða en eins og er þá eru norðanmenn í 2. sæti.
KA fer 3 stigum fyrir ofan Víkinga sem eiga einn leik til góða en eins og er þá eru norðanmenn í 2. sæti.
Vondur dagur
Daníel Laxdal er það reyndur leikmaður að hann á að geta haldið betur stjórn á skapi sínu en þetta. Viðbrögð hans sem leiddi til að hann fékk rautt spjald var til skammar.
Dómarinn - 4
Aðalbjörn var að dæma sinn fyrsta leik í Bestu deildinni og það gekk ekkert sérlega vel. Nokkrir skrýtnir dómar fyrir rauða spjaldið leiddi að því að hann missti Stjörnumennina í full mikinn pirring, Hrannar á líkast til að fá gult líka þegar það atvik á sér stað. Svo er líkast til skrýtnasti dómurinn þegar KA fær hornspyrnu eftir að það var augljóst að Ásgeir Sigurgeirs skallaði boltan útaf.