SKÝRSLAN: Víkingar með sýningu í Víkinni
Hvað réði úrslitum?
Víkingar splundruðu hápressu Eyjamanna oft í leiknum sem kom þeim í yfirburða stöður á vellinum sem þeir nýttu sér sex sinnum og hefðu getað nýtt talsvert oftar, Eyjamenn voru kraftmiklir og baráttuglaðir allan leikinn en voru í vandræðum með að skapa góða sénsa eða galopna Víkinga.
Bestu leikmenn
1. Matthías Vilhjálmsson (Víkingur)
Take a bow! - Leggur upp fyrstu tvö og óheppinn að skora ekki sjálfur strax í kjölfarið, frábær á miðjunni og skorar svo fjórða markið til að koma Víkingum aftur á bragðið, skellir sér svo bara í hafsentinn til að loka þessum leik eins og kóngurinn sem hann var inná vellinum í dag.
2. Pablo Punyed (Víkingur)
Frábær leikur hjá Pablo að venju, skorar tvö frábær mörk af miðjunni með því að skila sér inn í teig, var stórkostlegur á miðjunni og stjórnaði þessum leik frábærlega með Matta. Erlingur, Birnir, Helgi Guðjóns og Oliver Ekroth eiga allir skilið shout hérna líka, það var erfitt að velja í þennan dálk.
Atvikið
Rauða spjaldið, Elvis ver boltann á línu og það var vel tæpt frá mínu sjónarhorni hvort hann hafi verið inni eða ekki, einhverjir leikmenn Víkinga kölluðu eftir marki og engu spjaldi en Jóhann Ingi gat aldrei sleppt því eftir að hann flautaði, held þetta hafi verið ósjálfráð viðbrögð hjá Elvis frekar en viljandi enda glórulaust úr því sem komið var, má til með að hrósa Elvis sem var virkilega góður í leiknum þrátt fyrir að hafa fengið á sig 4 mörk og svo rautt.
Hvað þýða úrslitin?
Víkingar styrkja stöðu sína á toppnum og bæta markatöluna hressilega í þeirri baráttu við Val. Eyjamenn eru ennþá rétt fyrir ofan fallsvæðið og náðu ekki að hoppa upp í baráttuna um top 6.
Vondur dagur
Eiður Aron átti alls ekki sinn besta dag eins og reyndar fleiri í vörn Eyjamanna, en þegar besti leikmaður liðsins á slakan dag þá getur það orðið dýrt eins og raunin var í dag, var svo tekinn útaf fljótlega eftir fjórða mark Víkinga.
Dómarinn - 9
Mér fannst þetta algjör negla hjá Jóhanni Inga og hans teymi, þetta var harður leikur og var hann að spjalda menn á hárréttum augnablikum, sá engin augljós mistök en eina spurningamerkið er vítið sem Eyjamenn vildu í fyrri hálfleik, ég treysti því þó að Jóhann hafi bara neglt þá ákvörðun, frábær frammistaða í hörðum og krefjandi leik!