SKÝRSLAN: Goðsögn kvaddi Meistaravelli í bili
Hvað réði úrslitum?
KR-ingar voru hungraðari í þennan sigur. Þeir spiluðu virkilega vel á löngum köflum og verðskulduðu sigurinn að lokum. Maður sá viljann í augum leikmanna þegar komið var fram í uppbótartíma.
Bestu leikmenn
1. Benoný Breki Andrésson (KR)
Einn efnilegasti leikmaður landsins sýndi úr hverju hann er gerður. Tvö mörk og ein stoðsending. Leikmaður sem gæti gjörsamlega sprungið út á næsta tímabili.
2. Jason Daði Svanþórsson (Breiðablik
Var virkilega góður þann tíma sem hann var inn á vellinum. Skoraði og lagði upp.
Atvikið
Sigurmarkið í uppbótartímanum, auðvitað.
Hvað þýða úrslitin?
Þessi sigur gerir lítið fyrir KR en það hefur tilfinningalegt gildi að liðið hafi unnið í síðasta heimaleik Rúnars Kristinssonar í bili. Breiðablik hefði gulltryggt sig í Evrópu með sigri en ef FH vinnur Val í kvöld, þá verður liðið í baráttu um það að komast í Evrópukeppni í lokaumferðinni.
Vondur dagur
Mætingin hefði mátt vera betri frá stuðningsmönnum KR, allavega í byrjun leiks þegar goðsögnin Rúnar Kristinsson var heiðraður. Kveðjuleikur Rúnars á Meistaravöllum í bili. Þetta er maður sem hefur fært félaginu mikinn fjölda af titlum og hann átti skilið að fá enn fleira fólk á völlinn til að sjá þennan leik.
Dómarinn - 4
Klikkuðu illa í stöðunni 2-1 þar sem KR átti að fá vítaspyrnu. Líklega hefði Alexander Helgi átt að fá rautt spjald fyrir þá tæklingu líka en hann slapp alveg. Nokkrar skrítnar ákvarðanir hér og þar líka.