SKÝRSLAN: Nýliðarnir réðu ekki við Framara í fyrsta leik sínum í efstu deild
Hvað réði úrslitum?
Framarar stjórnuðu leiknum vel sérstaklega í fyrri hálfleik. Vestri kom aðeins til baka í seinni en sýndu ekki nóg til þess að minnka muninn. Rúnar Kristins virðist vera búinn að smíða gott lið í Úlfarsárdalnum
Bestu leikmenn
1. Kennie Chopart (Fram)
Kennie var að spila sem hægri hafsent í þriggja manna vörn. Hann var virkilega flottur varnarlega og steig mikið upp úr vörninni til að taka þátt í spilinu og kom mikið upp kantinn og var hættulegur í sóknarleiknum. Hann bjó til seinna markið með fyrirgjöf sem fór í Eið Aron og inn.
2. Fred Saraiva (Fram)
Fred er ákveðinn töframaður og þegar Fram liðinu tókst að spila sig í gegnum vörn Vestra þá var það oftast hann sem átti stærsta þáttinn í því. Hann skoraði virkilega flott mark til að koma Fram yfir í leiknum.
Atvikið
Adam Örn náði að bjarga marki á stórkostlegan hátt í uppbótartíma þegar Tufa virtist vera búinn að skora. Adam tók svakalegan sprett og potaði boltanum af marklínunni.
Hvað þýða úrslitin?
Framarar byrja tímabilið á góðum sigri og ná í mikilvæg þrjú stig. Vestri fer heim með ekkert úr leik sem þeir hefðu haldið að þeir gætu fengið eitthvað úr þar sem þeir hefðu getað mætt með krafti í sinn fyrsta leik í efstu deild.
Vondur dagur
Eiður Aron Sigurbjörnsson mun ekki eiga frábærar minningar af sínum fyrsta leik í Vestra treyjunni. Vörnin sem heild átti oft erfitt með hratt spil Framara og svo tókst Eið að skora sjálfsmark sem koma Fram í stöðuna 2-0
Dómarinn - 6
Vilhjálmur Alvar dómari leiksins átti ágætan leik þó pínu skrítinn. Það var enginn stór dómur sem hann missti af nema mögulega vítaspyrnudómur á 72. mínútu en ég held að það hafi verið rétt hjá Vilhjálmi að dæma ekki þar. Það sem dregur hann aðallega niður í einkunn var mikið af stoppum sem hann gerði í leiknum sem voru annaðhvort óþörf eða komu á skrítnum tímum þegar menn voru búnir að jafna sig og staðnir upp, og töfðu því bara flæðið í leiknum.