Rauða spjaldið hafði mikið um það að segja. Stjarnan sótti stíft eftir það og náði markinu rétt fyrir hálfleik. Stjörnumenn róuðu síðan tempóið í seinni hálfleik og Valsarar reyndu eins og þeir gátu að sækja en það gekk ekki nógu vel og niðurstaðan var nokkuð öruggur sigur.

Rauða spjaldið sem Bjarni Mark fær á sig er alveg hrikalega klaufalegt. Bjarni var nýbúinn að fá gult spjald þegar hann ákveður að renna sér í bakið á Örvari Eggerts á vallarhelming Stjörnumanna. Réttilega seinna gula og hann skildi liðsfélaga sína eftir í súpunni.

Stjarnan sækir sín fyrstu stig í mótinu og eru því komnir með 3 stig. Valsarar eru með 4 stig eftir fyrstu 3 leikina sem er gríðarleg vonbrigði fyrir þá.

Bjarni Mark verður að fá þetta á sig þar sem þetta rauða spjald var svakalegur klaufaskapur og algjör óþarfi.

Erlendur átti góðan leik að mínu mati. Þetta var erfiður leikur með nóg af brotum og spjöldum en þau voru öll réttmætanlega fyrir mér nema mögulega spjaldið sem Kristinn Freyr fær fyrir að vera reiður út í eigin liðsfélaga.