SKÝRSLAN: Ísak og Jason tvíeykið komið á ról á ný
Hvað réði úrslitum?
Breiðablik voru bara betri á flestum sviðum leiksins. Mér fannst þeir mæta út í leikinn með það hugarfar að það kæmi ekkert annað til greina en sigur. Fannst þetta þroskaðari frammistaða en þeir hafa oft á tíðum sýnt gegn HK. Þeir voru baráttuglaðir og sýndu mikil gæði. HK voru ekki tilbúnir í baráttuna.
Bestu leikmenn
1. Ísak Snær Þorvaldsson
Besti leikur Ísaks í sumar. Var síógnandi og maður tók eftir því að hann er einfaldlega bara sterkari og kraftmeiri en aðrir leikmenn á vellinum. Ef hann ætlar að spila svona restina af sumrinum þá fara önnur lið að þurfa að signa sig áður en gengið er inn á völlinn. Arnar Freyr varði vel frá honum í fyrri hálfleik.
2. Jason Daði Svanþórsson
Hefði alveg getað verið númer eitt líka þannig séð. Var mjög kraftmikill og lunkinn með boltann í dag og skoraði gott mark. Hefði getað skorað annað með seinustu spyrnu fyrri hálfleiks en þá varði Arnar Freyr frábærlega með einni af betri vörslum sumarsins til þessa.
Atvikið
Fyrsta mark Breiðabliks gerði það að verkum að þeir gátu mætt með annað hugarfar inn í seinni hálfleik. Gott mark hjá Jasoni en auðvitað er ákveðinn skuggi yfir markinu vegna þess að það átti ekki að standa. Höskuldur tók aukaspyrnu í aðdragandanum þar sem boltinn var ekki stöðvaður. Ætla einnig að nýta þetta til að minnast á atvikið þar sem Eiður Gauti meiðist að því er virðist nokkuð alvarlega eftir örfáar sekúndur í leiknum. Sendum kærar batakveðjur á Eið Gauta Sæbjörnsson.
Hvað þýða úrslitin?
Blikar eru áfram í 2. sæti þremur stigum á eftir Víkingum. HK eru með sjö stig í 10. sæti.
Vondur dagur
Mér fannst HK ekki eiga skilið neitt út úr leiknum vegna þess að þeir sýndu ekki baráttuna sem þurfti að sýna til að vinna leikinn. Fengu til að mynda ekki gult spjald í dag sem segir sitt.
Dómarinn - 5
Ívar gerir sig sekan um afdrifarík mistök þegar hann leyfir fyrsta markinu að standa. Boltinn var á hreyfingu þegar aukaspyrnan var tekin og það er enginn spurning um það.