SKÝRSLAN: Þolinmæðisverk á Samsungvellinum
Hvað réði úrslitum?
Þetta var þolinmæðisverk hjá Stjörnunni í kvöld. Stjarnan var meira með boltann og stýrði leiknum en Fylkismenn vörðust vel og áttu flottar skyndisóknir inni á milli. Það var ekki endilega mikið sem benti til þess að það kæmi mark í þennan leik undir restina en innkoma Emils Atlasonar og Örvars Eggertssonar átti heldur betur eftir að reynast heimamönnum vel. Annar skoraði fyrsta markið á meðan hinn lagði upp annað markið og þar við sat.
Bestu leikmenn
1. Helgi Fróði Ingason
Mér fannst Helgi Fróði eiga flottan leik í dag. Kórónaði það svo með flottu marki undir restina. Átti flottar sendingar í leiknum líka sem hefðu hæglega getað orðið stoðsendingar. Maður varð alltaf spenntur að sjá hvað gerðist næst þegar hann komst á boltann.
2. Kjartan Már Kjartansson
Maður er vanari að sjá hann framar á vellinum en hann spilaði djúpan miðjumann í dag og leysti það feyki vel. Var valinn maður leiksins af Stjörnumönnum á vellinum.
Atvikið
Má nefna bæði mörkin. Fyrra sem brýtur ísinn en þessi fyrsta snerting hjá Helga Fróða sem býr til annað markið var frábær og afgreiðslan ekkert síðri.
Hvað þýða úrslitin?
Stjörnumenn lyfta sér upp í efri hlutann í töflunni en Fylkir sitja áfram á botni deildarinnar.
Vondur dagur
Enginn sem á skilið að sjá nafnið sitt í þessum dálki í kvöld. Allavega enginn sem ég man eftir svona stuttu eftir leik. Bæði lið spiluðu bara vel í kvöld.
Dómarinn - 5
Alls ekkert hræðilegur leikur hjá dómara leiksins í dag en hefði mátt flauta aðeins minna. Var oft full fljótur að rífa í spjöldin líka.