SKÝRSLAN: Héldu Þjóðhátíðinni áfram í Grafarvoginum
Hvað réði úrslitum?
Beinskeyttir Eyjamenn ógnuðu úr öllum áttum og ljóst að ekkert annað en sigur kom til greina af þeirra hálfu. Þetta var þeirra dagur og þegar þrjú mörk komu á færibandi á ótrúlegum lokamínútum fyrri hálfleiksins var ekki aftur snúið. Fjölnismenn voru eins og lömb leidd til slátrunar.
Bestu leikmenn
1. Oliver Heiðarsson - ÍBV
Er nú einn markahæstur í deildinni. Þessi kraftmikli og vinnusami sóknarmaður hefur verið stórkostlegur í sumar og sjálfstraustið geislar af honum.
2. Tómas Bent Magnússon - ÍBV
Þegar hann teygir sig upp í skallabolta á enginn annar möguleika. Átti algjörlega frábæran leik að öllu leyti. Vicente Valor tekur svo þriðja sætið.
Atvikið
Þegar Oliver Heiðarsson skoraði flautumark í lok fyrri hálfleiks og gerði að verkum að ÍBV fór með fjögurra marka forystu inn í hálfleikinn! Þrjú mörk á færibandi í blálok fyrri hálfleiksins og heimamenn voru slegnir.
Hvað þýða úrslitin?
Þessi úrslit galopna algjörlega baráttuna um efsta sæti deildarinnar. Sparkspekingar tala um ÍBV sem besta lið deildarinnar og nú er það aðeins einu stigi frá Fjölnisliðinu á toppnum. Aðeins efsta sætið gefur beint sæti í Bestu deildinni. Liðin í sætunum fjórum þar fyrir neðan fara í umspil.
Vondur dagur
Það var samstillt átak Fjölnismanna um að vera daprir í þessum leik. Þeir voru algjörlega út úr karakter í sínum varnarleik og varnarmennirnir þeirra ungu og markvörðurinn sem hafa fengið verðskuldað lof í sumar áttu mjög erfitt kvöld. Voru aumir í varnarleik sínum í föstum leikatriðum sem er ekki líkt því sem maður hefur séð í sumar.
Dómarinn - 6,5
Leyfði leiknum að fljóta eins og hann er frægur fyrir og lét ekki veiða sig í gildrur þegar menn féllu auðveldlega í teignum. En það dregur hann niður er þetta glórulausa gula spjald á Oliver sem gerir að verkum að hann verður í banni í næsta leik.