SKÝRSLAN: Það er eitthvað sérstakt í gangi í Neðra-Breiðholtinu
Hvað réði úrslitum?
ÍR-ingar eru ótrúlegt stemningslið. Þegar þeir komust yfir þá voru þeir aldrei að fara að hleypa Þrótturum aftur inn í þetta. Og þeir voru líklegri til að vinna þetta stærra en Þróttur að jafna. ÍR-liðið er ótrúlega sterkt á grasinu í neðra-Breiðholtinu og það er erfitt að fara þangað. Þeir brjóta hin liðin niður og þau missa trúna á að þau séu að fara að gera eitthvað. Það er andi yfir ÍR-svæðinu þessa dagana, mikill andi.
Bestu leikmenn
1. Róbert Elís Hlynsson (ÍR)
Strákurinn ungi gerði sigurmarkið og var virkilega flottur inn á miðsvæðinu. Félög í efstu deild hafa sýnt honum áhuga og það er skiljanlegt. Mjög flott mark hjá honum og góð frammistaða.
2. Arnór Gauti Úlfarsson (ÍR)
Er einn mikilvægasti leikmaðurinn í þessu ÍR-liði og á skilið meira umtal fyrir frammistöðu sína í sumar. Frábær í hjarta varnarinnar með Marc McAusland.
Atvikið
Sigurmarkið sem Róbert Elís skorar eftir langt innkast frá eldri bróður sínum, Óliver Elís. Alvöru tenging þar á milli.
Hvað þýða úrslitin?
ÍR hoppar upp í fjórða sæti og er núna fimm stigum á undan liðinu í sjötta sæti. Það eru bara býsna góðar líkur á því að við sjáum ÍR í úrslitakeppninni og þar verða þeir erfiðir við að eiga. Þetta var lykilleikur fyrir Þróttar en þeir eru með 20 stig í sjöunda sæti. Úrslitakeppnin fjarlægist þá.
Vondur dagur
Þróttaraliðið olli mér miklum vonbrigðum í þessum mikilvæga leik. Þeir sköpuðu sér ekki færi eftir að ÍR tók forystuna. Sóknarleikurinn var afskaplega bragðdaufur frá 20. mínútu þangað til það var flautað af. Svo fékk undirritaður fréttir af því að þjálfarinn væri farinn heim áður en hægt var að ná honum í viðtal. Þróttarar fara fúlir á koddann í kvöld.
Dómarinn - 6
Nokkrar skrítnar ákvarðanir en það voru lítil atriði. Ágætlega dæmdur leikur.