SKÝRSLAN: Langskot af bestu gerð skila Stjörnunni sigurinn
Hvað réði úrslitum?
FH var betra liðið í fyrri hálfleik en nýtti góðar stöður og færi illa. Það var svo meira jafnræði á liðunum í seinni hálfleik fram að því að Óli Valur smurði boltan upp í skeytin. Guðmundur Baldvin sagði þá: ,,Það sem þú getur gert, get ég líka" og slengdi öðrum bolta upp í skeytin. Það var svo ekki aftur snúið eftir það.
Bestu leikmenn
1. Óli Valur Ómarsson (Stjarnan)
Óli Valur var hættulegasti sóknarmaður Stjörnunnar í dag og kórónaði sína frammistöðu með þessu frábæra marki.
2. Kjartan Már Kjartansson (Stjarnan)
Kjartan var virkilega flottur á miðjunni hjá Stjörnunni í dag. Hann var stór ástæða fyrir því að FH skapaði sér verulega lítið í opnum leik. Svo tók hann ágætlega þátt í sóknarleiknum.
Atvikið
Strax eftir fyrsta markið byrjaði einhver hiti að malla í leiknum og það leið ekki langur tími þangað til hlutirnir voru komnir að suðupunkti. Á 71. mínútu skella menn eitthvað saman inn í teig eftir horn og eftir það fara menn eitthvað að kítast. Það átti svo bara eftir að gerast ýtrekað aftur í leiknum. Ótrúlegt að leikurinn hafi haldist 11 á móti 11.
Hvað þýða úrslitin?
FH er áfram í 4. sæti deildarinnar en Stjarnan er núna aðeins stigi á eftir þeim í 6. sæti. Ef Fram tapar fyrir HK í kvöld þá eru Stjörnumenn öruggir í topp 6.
Vondur dagur
Hafsenta parið Ísak Óli og Ólafur Guðmunds. Þeir gefa boltan frá sér í báðum fyrstu mörkunum sem Stjarnan skoraði í leiknum. Gerðu það líka oftar en bara þau skiptin, ekki þeirra besti dagur í útspilinu.
Dómarinn - 5
Þvílíkt erfiður leikur að dæma þar sem það var rosaleg harka. Þess vegna gef ég Pétri smá afslátt og gef honum ekki fall einkunn. Hinsvegar er ég alveg á því að Örvar Eggerts hefði átt að fá allavega tvö gul í þessum leik ef ekki fleiri, ef það væri hægt. Fleiri skipti líka þar sem spjöld hefðu átt að fara á loft, og þegar það byrjaði að myndast gríðarlega mikill hiti í leiknum þá gerði Pétur ekki nærrum því nóg til að halda stjórn á leiknum. Það var kafli þarna í seinni hálfleik sem leystist upp í vitleysu og það er að hluta til á honum.