SKÝRSLAN: Sannkallaður leikur tveggja hálfleika á N1 vellinum
Hvað réði úrslitum?
Valur byrjaði leikinn vel en Stjörnumenn tóku fljótlega öll völd á vellinum og leiddu sannfærandi og sanngjarnt eftir fyrri hálfleikinn. Það var hinsvegar allt annað að sjá Val í síðari hálfleik og þeir náðu að jafna leikinn. Þegar öllu er á botnin hvolft þá eru þetta líklega sanngjörn úrslit.
Bestu leikmenn
1. Gylfi Þór Sigurðsson
Hann steig upp í kvöld þegar liðið hans þurfti hvað mest á honum að halda. Valsmenn þurftu eitthvað sérstakt til að ná inn jöfnunarmarkinu og þar kom Gylfi inn og skoraði frábært mark. Munar um að hafa svona leikmann.
2. Óli Valur Ómarsson
Valið stóð á milli Óla Vals og Emil Atla Stjörnumeginn. Báðir voru svolítið burðarrásir Stjörnunnar fram á við. Óli Valur var að valda ursla í "slæma kaflanum" hjá Stjörnunni svo hann fær þetta.
Atvikið
Það þurfti eitthvað sérstakt frá Val til þess að jafna leikinn og Gylfi Þór sýndi okkur að það eru enn hörku gæði þarna sem fáir ef einhverjir aðrir hafa í þessari deild þegar hann jafnaði leikinn.
Hvað þýða úrslitin?
Valur heldur enn í 3.sætið á meðan Stjarnan lyftir sér upp fyrir ÍA í 4.sætið.
Vondur dagur
Get ekki gefið neinum þetta í dag. Bæði lið áttu heilt yfir góðan dag.
Dómarinn - 8
Mér fannst teymið bara vera mjög gott í dag. Leyfði leiknum að fljóta og lét ekki veiða sig í neinar gildrur. Alltaf hægt að grafa eftir einhverju en ég man ekki eftir neinu atviki í leiknum þar sem ég furðaði mig á dómgæslu.