SKÝRSLAN: Vestri áfram í efstu deild en Fylkir kveðja með stæl
Hvað réði úrslitum?
Þegar Vestramönnum var ljóst að KR-ingar voru að klára HK-inga kom annað lið út í seinni hálfleikinn. Fylkismenn gengu á lagið og voru miklu betri í síðari hálfleik.
Bestu leikmenn
1. Halldór Jón Sigurður Þórðarson
Innkoma hans breytti leiknum. Skoraði úr sinni fyrstu snertingu og jafnaði leikinn og fékk vítið sem kláraði leikinn.
2. Fatai Gbadamosi
Áður en Vestri lögðu árar í bát var Fatai bestur á vellinum. Skoraði sitt fyrsta mark og vann ófáa bolta sem aftasti maður á miðju heimamanna.
Atvikið
Fyrsta mark Fylkis gaf þeim mikið sjálfstraust og það var bara eitt lið á vellinum eftir það.
Hvað þýða úrslitin?
Vestri verður áfram í efstu deild en örlög Fylkis voru löngu ráðin. Þeir verða í Lengjudeildinni en þeir sýndu í dag að það eru margir efnilegir menn innan þeirra raða.
Vondur dagur
Erfitt að segja vondur dagur á einhvern í Vestra þar sem þeir lögðu svo lítið í seinni hálfleik. Tóku sína hættulegustu menn útaf á 60. mínútu t.d. Ég set þetta því á boltann, ég hefði viljað fá annan lit en hvítan á leikboltann í snjókomunni í síðari hálfleik.
Dómarinn - 9
Ekki mikil ákefð í þessum leik og öll gulu spjöldin ákaflega greinileg. Vítið var hendi en svosem veit maður aldrei hvað er hendi lengur. Þægilegur leikur að dæma að mörgu leyti, en vísast erfiður að dæma út af kulda.