SKÝRSLAN: Víta jafntefli á Hlíðarenda
Hvað réði úrslitum?
Sitthvort liðið fékk réttilega víti og bæði skoruðu úr þeim. Ég gæti endað þetta þannig því það var lítið um færi í leiknum Valsarar heilt yfir örlítið betri af mínu mati, en Víkingar fengu tvö stórhættuleg færi í lok leiks þar sem þeir hefðu getað stolið þessu.
Bestu leikmenn
1. Bjarni Mark Antonsson Duffield (Valur)
Vörnin var mjög þétt og öflug hjá Val í dag þar sem þeir gáfu Víkingum mjög lítið færi á að skora. Bjarni fær að vera fulltrúi eftir algjörlega stórkostlega björgun á lokamínútunum.
2. Helgi Guðjónsson (Víkingur)
Helgi spilaði lengst af í vængbakverði fyrir Víkinga í dag og tókst að halda hættulegasta leikmanni Valsara Jónatan Inga nokkuð þöglum. Hann skoraði einnig úr vítinu en það var fátt um framúrskarandi frammistöður í þessum leik þannig Helgi þurfti ekki að gera meira til þess að vera númer 2.
Atvikið
Víkingar fá tvö stórhættuleg færi í lok leiks þar sem í fyrra skiptið ver Stefán mjög vel frá Helga Guðjónssyni og boltinn smellur svo í slánni. Nokkrum sekúndum þar á eftir á Valdimar skot sem er á leiðinni inn, en Bjarni Mark tekur bakfallspyrnu á marklínunni og nær að hreinsa boltann frá.
Hvað þýða úrslitin?
Valsarar eru enn taplausir en hafa gert þrjú jafntefli í fyrstu fjórum leikjunum og eru því með 6 stig í 7. sæti deildarinnar. Víkingar hafa núna ekki unnið þrjá leiki í röð ef bikarinn er talinn með og aðeins skorað þetta eina mark úr vítaspyrnu í þeim þremur leikjum. Þeir eru með 7 stig í 2. sæti deildarinnar.
Vondur dagur
Það eru tvö víti í þessum leik og í bæði skipti klaufamistök hjá þeim sem braut af sér. Birkir Heimisson hjá Val og Gunnar Vatnhamar hjá Víking. Hinsvegar voru mjög langir kaflar í þessum leik þar sem Gylfi Þór Sigurðsson sem var valinn besti leikmaður deildarinnar af fréttariturum Fótbolti.net var hreinlega ósýnilegur. Maður setur háar kröfur á Gylfa en hann er ekki að komast nálægt því að mæta þeim í byrjun tímabils.
Dómarinn - 9
Mjög erfiður leikur að dæma þar sem var mikil harka og tveir vítadómar. Sigurður gerði rétt í báðum vítunum og hann leyfði hörkunni að lifa í leiknum eins vel og hann gat. Eflaust nokkur lítil atriði sem voru röng, en mér fannst teymið skila afbragðs vinnu í kvöld.