SKÝRSLAN: Dauft jafntefli í Laugardalnum
Hvað réði úrslitum?
Tvö mörk skoruð snemma í báðum hálfleikjum en það gerðist ekkert gríðarlega mikið meira en það. Þróttarar áttu nokkur fín færi en heilt á litið er jafntefli líkast til sanngjörn úrslit. Þróttarar líkast til aðeins svekktari að fá bara eitt stig.
Bestu leikmenn
1. Eiríkur Þorsteinsson Blöndal (Þróttur)
Lítið um framúrskarandi frammistöður í þessum leik og valið erfitt hjá mér. Eiríkur var hinsvegar flottur í vinstri vængbakverðinum, orkumikill, öruggur varnarlega og með nokkrar fínar fyrirgjafir.
2. Dusan Brkovic (Leiknir)
Dusan var í ræstingarhlutverki í dag, þar sem hann var öflugur að hreinsa frá þegar Þróttarar komu nálægt marki eða gáfu fyrir.
Atvikið
Á 81. mínútu fer Njörður Þórhallsson nokkuð hressilega í Shkelzen Veseli en Njörður var þá þegar á gulu spjaldi. Það er alveg hægt að færa rök fyrir því að hann hefði átt að fá annað gula, en mér fannst það bara fín ákvörðun hjá Aðalbirni dómara leiksins að sleppa því.
Hvað þýða úrslitin?
Bæði lið byrja tímabilið með 1 stig en þau þurfa bæði að skerpa sóknarleikinn ef þau ætla sér eitthvað í þessari deild.
Vondur dagur
Sóknarleikurinn í þessum leik var heilt yfir ekki góður en Leiknismenn voru verri en Þróttararnir. Dagur Ingi Hammer sást lítið, Shkelzen Veseli komst í góðar stöður en gerði lítið við þær og Róbert Quental var einnig ekki að skapa mikið. Axel Freyr Harðarson var orkumestur af fremstu mönnum Leiknis og uppskar mark, en hann var svo sem heldur ekki að skapa neitt gríðarlega mikið.
Dómarinn - 7
Fram að svona 70-75. mínútu var þetta bara mjög vel dæmdur leikur. Í lokin fannst mér Aðalbjörn missa leikinn aðeins frá sér og spjöldin fóru að fljúga. Þá áttu flest rétt á sér en ekki öll að mínu mati, línan þarna í lokin fannst mér líka aðeins fara að beygjast.