SKÝRSLAN: Keflavík lét finna fyrir sér – en Stjarnan skein fyrir rest
Hvað réði úrslitum?
Úrslitin réðust einfaldlega á gæðum – annað liðið leikur í Bestu deildinni, hitt í Lengjudeildinni. Betra liðið vann, og það er lítið sem hægt er að setja út á frammistöðu Keflavíkur. Þeir börðust af krafti, náðu að stríða Stjörnunni og komust tvisvar yfir í leiknum. Á íslensku er Stjarnan einfaldlega betra fótboltaliðið.
Bestu leikmenn
1. Jóhann Árni Gunnarsson
Það voru nokkrir leikmenn Stjörnunnar sem komu sterklega til greina sem maður leiksins, en að lokum varð að velja einn – og sá heiður hlýtur Jóhann Árni. Hann var frábær á miðjunni í kvöld, bæði varnar- og sóknarlega, og setti punktinn yfir i-ið með glæsilegu marki.
2. Benedikt V. Waren
Hann var síógnandi á vinstri kantinum í kvöld og átti frábært samspil við Örvar Loga. Samvinna þeirra skilaði þriðja marki Stjörnunnar, sem kom liðinu yfir í fyrsta sinn í leiknum – forysta sem þeir héldu út leikinn og litu aldrei til baka.
Atvikið
Eftirminnilegasta atvik leiksins kom þegar Keflavík náði að skora upp úr engu og komast í 1–0. Fram að því bjó Stjarnan á vallarhelmingi Keflavíkur, og það virtist aðeins vera spurning um tíma hvenær fyrsta mark þeirra myndi koma. Þá, gegn gangi leiksins, kom há sending úr vörn Keflavíkur, önnur strax á eftir inn í teig – og allt í einu var boltinn kominn í netið. Óvænt forysta á 15. mínútu leiksins.
Hvað þýða úrslitin?
Úrslitin þýða að Stjarnan er komin í undanúrslit en Keflavík getur farið að einbeita sér alfarið að Lengjudeildinni.
Vondur dagur
Það er hvorki hægt að segja að tiltekinn leikmaður né lið hafi átt slakan leik. Þetta var virkilega skemmtilegur og vel leikinn fótboltaleikur þar sem Keflavík lagði sig alla fram til að stríða heimamönnum. Að lokum réði þó gæðamunurinn úrslitum og niðurstaðan endurspeglar þá staðreynd. Bæði lið og leikmenn þeirra geta verið stoltir af frammistöðunni í kvöld
Dómarinn - 7
Leikurinn var vel dæmdur af Arnari Þór og félögum. Bæði gulu spjöldin áttu rétt á sér og eina athugasemdin sem hægt er að gera er sú að það er óskiljanlegt hvers vegna Alex fékk ekki einnig gult spjald, þegar hann togaði í Erni aftan frá með báðum höndum – beint fyrir framan nefið á Arnari.