SKÝRSLAN: Höktandi byrjun á Suðurnesjum
Hvað réði úrslitum?
Vandamálin geta verið af ýmsum toga. Reiknaði þó ekki með í dag að sitja og horfa á svartan skjá í ríflega klukkutíma í stað þess að horfa á leik Grindavíkur og Njarðvíkur vegna netvandamála í Grindavík. Staðan er því bara þessi. Þó ég glaður vildi geta sagt eitthvað um það hvað réði úrslitum þá hreinlega get ég það ekki.
Bestu leikmenn
1. Tæknimenn sem gerðu það sem þeir gátu.
Shit happens sagði einhver. Það á vel við í dag. Vandamálin komu upp og voru erfið viðfangs greinilega. En það tókst þó að koma útsendingu í loftið og við fengum um 20 mínútur af fótbolta í lokin.
2. Guy Smit
Varði úr nokkrum góðum færum á þeim mínútum sem útsending var í loftinu. Gefum honum þetta
Atvikið
Ég veit þó eitt. Njarðvík skoraði mark í leiknum en hvorki Pétur né aðstoðarmenn hans sáu það. Hart fyrir Njarðvíkinga að þurfa að kyngja því eftir svona leik.
Hvað þýða úrslitin?
Grindvíkingar gera annað jafntefli sitt í röð og eru þar með með 2 stig eftir 2 leiki. Njarðvíkingar setja sitt fyrsta stig á töfluna.
Vondur dagur
Njarðvík er búið að spila 180 mínútur af fótbolta án þess að skora mark sem telur. Það er auðvitað ekki gott fyrir lið sem ætlar sér að gera atlögu að sæti í Bestu deildinni og lagði mikið í það fyrir mót.
Versta daginn átti samt án efa routerinn á Grindavíkurvelli sem virtist því miður ekki ráða við verkefnið að streyma fótboltaleik í dag. Hvað sem veldur verður það vonandi komið í lag fyrir næsta heimaleik þeirra.
Dómarinn - 5
Tríóið missir af marki, það telst ekki gott. Að öðru leyti hef ég alls engar forsendur til þess að meta þeirra frammistöðu.