SKÝRSLAN: Hafa fengið á sig tuttugu mörk í síðustu þremur leikjum
Hvað réði úrslitum?
Þróttur er einfaldlega miklu betra lið en Ægir. Það sást frá fyrstu mínútu. Gestirnir fóru aðeins marki undir í hálfleikinn en mörk þeirra komu bæði upp úr þurru. Þróttarar mættu svo gíraðir inn í seinni hálfleik og það var ekki spurning eftir að Magnús Ingi tvöfaldi forystuna í seinni hálfleik.
Bestu leikmenn
1. Aron Snær Ingason (Þróttur)
Aron var frábær í dag. Hann lék á als oddi í kvöld og varnarmenn Ægis réðu ekkert við hann. Aron lagði upp fyrsta mark leiksins og skoraði svo þrjú!
2. Magnús Ingi Þórðarson (Þróttur)
Tvenna hjá Magnúsi í dag sem var ekki langt frá því að bæta marki við undir lokin. Það var aðeins erfiðara að velja í þennan flokk, Sigurður Egill og Kári Kristjáns lögðu báðir upp tvö mörk og eiga skilið að fá tilnefningu.
Atvikið
Lokamark leiksins var vægast sagt skrautlegt. Baptiste Gateau ætlar að taka stutta aukaspyrnu við eigin vítateig en sendir einfaldlega á Sigurð Egil. Það var enginn Ægismaður nálægt Sigurði og ég hreinlega veit ekki hvað Baptiste var að hugsa þarna. Eftirleikurinn var svo auðveldur og Magnús skoraði sitt annað mark.
Hvað þýða úrslitin?
Fallnir Ægismenn verma enn botnsætið og eru með markatöluna 3-20 í síðustu þremur leikjum. Þróttur er enn í öðru sæti deildarinnar. Nú eru tvö stig í Aftureldingu sem getur unnið mótið með sigri á Vestra á morgun.
Vondur dagur
Ibrahima Jallow átti slakan dag í marki Ægismanna. Þetta var fyrsti leikur hans fyrir Ægi og hann heillaði ekki. Fékk sjö mörk á sig og nokkur þeirra alls ekki góð. Hann gaf til að mynda Aroni Snæ nærhornið í þriðja marki hans.
Dómarinn - 8
Jóhanni Ingi og hans teymi stóð sig vel í dag.