SKÝRSLAN: Skemmtilegt var það ekki, en það hafðist
Hvað réði úrslitum?
Gæðalítill leikur þar sem hvorugt liðið skapaði sér eitthvað af viti og hefði undir venjulegum kringumstæðum endað 0-0. Gestirnir ná inn einu skítamarki sem virðist mögulega hafa verið rangstaða og þetta mark kjarnaði þennan leik ágætlega, gæðalítið og tilviljanakennt. FH létu þetta ekki hafa áhrif á sig og gerðu mjög vel í að sigla þessu heim. Þrátt fyrir lítið af fallegum fótbolta mættu þær gestunum í baráttunni og á því vinnst einvígið að lokum.
Bestu leikmenn
1. Andrea Rán Snæfeld Hauksdóttir (FH)
Andrea var langbesti leikmaður FH í þessum leik að mínu mati. Í liði þar sem margir reynslulitlir leikmenn létu stressið hafa áhrif á sig var Andrea einhver sem þær gátu alltaf leitað til í þeim tilgangi að róa aðeins leikinn, halda í boltann og velja réttu sendinguna. Varðist oft vel og fór fyrir FH liðinu í dag í því að sigla þessu heim.
2. Jónína Linnet (FH)
Grjóthörð í vörninni og var að gera vel þegar gestirnir gerðu áhlaup. Bjargaði vel inn í á síðustu stundu oft á tíðum og það er tækling í lokin sem endanlega kom henni í þennan dálk þar sem hún elti uppi sóknarmann Apollon og átti frábæra tæklingu.
Atvikið
Í leik þar sem afar lítið gerðist ætla ég að leita í stúkuna í þessum dálki. Partur af teymi gestanna sat uppí stúku og það vakti athygli þegar eldri maður sem var greinilega partur af því byrjaði að láta FH börn í stúkunni heyra það. Ansi blóðheitir gestirnir bæði innan sem utan vallar en það er alltaf gaman af.
Hvað þýða úrslitin?
FH vinnur fyrsta Evrópueinvígi í sögu kvennaliðsins og verður í pottinum á föstudaginn þegar dregið verður í næstu umferð.
Vondur dagur
Sóknarleikur FH var ekki upp á marga fiska í dag. Þær reyndu lítið sem ekkert á Isabella Hara sem stóð á milli stanganna og greinilegt að stærð leiksins hafði áhrif. Úrslitasendingar sem voru oft á tíðum arfa slakar og einfaldari sendingar sem hittu einfaldlega ekki samherja. Það hafði þó ekki áhrif og sóknarmenn FH geta sýnt hvað í þeim býr í næstu umferð
Dómarinn - 4
Dómari leiksins fór óstjórnlega í taugarnar á mér í þessum leik, sú var mætt til að nota flautuna. Flautaði á allt og ekkert sem varð til þess að leikurinn, sem var ekki frábær fyrir, varð ennþá hægari og leiðinlegri fyrir vikið. Einhver orðrómur um að markið sem skorað var hafi ekki átt að standa og svo voru margar aðrar skýtnar ákvarðanir, bæði hjá henni og félögum hennar á flagginu. Gerði gestina svo alveg bandbrjálaða í lokinn með því að bæta aðeins við tveimur mínútum sem var líklega aðeins of lítið.