Fara Akureyrarliðin saman niður?

KA keypti Danijel Dejan Djuric dýrum dómi í vetur sem hefur ekki staðið undir væntingum. Þá hefur Oliver Heiðarsson sömuleiðis ekki fundið taktinn.

Í Innkastinu var rætt um þær sögusagnir að KA ætlaði ekki að styrkja sig í glugganum. „Útskýringin hlýtur að vera sú að þeir séu búnir með peninginn,“ sagði Haraldur Örn.

Sömu sögu er ekki að segja af Þórsurum sem hafa verið orðaðir við marga leikmenn. Sigurður Heiðar Höskuldsson, þjálfari Þórs, sagði við Fótbolta.net á dögunum að Þór ætlaði að reyna fá inn leikmann í hverja línu í komandi félagaskiptaglugga sem opnar 16. júlí.

Þeir voru síðast orðaðir við Damir Muminovic, leikmann Grindavíkur, í Dr. Football fyrr í dag. Þá hafa þeir jafnframt reynt við Árna Vilhjálmsson og Guðmund Andra Tryggvason, sem er farinn í FH. Greint hefur verið frá því að Aron Einar Gunnarsson hafi skrifað undir samning við uppeldisfélagið og yrði það gríðarlegur liðsstyrkur.

Ef horft er á úrslit síðustu fimm leikja er KA-liðið með verstu uppskeruna, núll stig. Þórsarar eru þar fyrir ofan með eitt stig. Næstu lið fyrir ofan Akureyrarliðin eru Valur með fjögur stig og FH með fimm stig.