Þýskaland: Augsburg með gott tak á Gladbach

Augsburg nældi í góðan sigur gegn Gladbach í kvöld eftir slæmt 4-0 tap gegn RB Leipzig í síðustu umferð.

Gladbach var mun meira með boltann í fyrri hálfleik en það var Augsburg sem komst yfir áður en flautað var til loka fyrri hálfleiksins þegar Kevan Schlotterbeck tók boltann á kassann og smellti honum í netið.

Alexis Claude-Maurice bætti öðru markinu við eftir klukkutíma leik og stuttu síðar tókst Gladbach að minnka muninn en nær komust þeir ekki.

Gladbach hefur gengið afar illa gegn Augsburg á útivelli en þetta var fjórtándi leikur liðanna í röð á heimavelli Augsburg þar sem Gladbach nær ekki í sigur.