Championship spáin - Leeds vinnur og Íslendingalið á botninum

1. Leeds United - Daniel Farke var hársbreidd frá því að koma Leeds upp á síðasta tímabili og nú ætlar hann á toppinn. Leeds hefur litið vel út á undirbúningstímabilinu.

2. Luton Town - Rob Edwards er áfram með stjórnartaumana og liðið hefur haldið lykilmönnum frá síðasta tímabili. Stöðugleiki einkennir Luton.

3. Burnley - Jóhann Berg Guðmundsson verður áfram hjá Burnley og ætlar að hjálpa liðinu að komast beint aftur upp. Scott Parker er mættur sem stjóri.

4. Middlesbrough - Það er mikill metnaður hjá Boro og væntingar um að Michael Carrick komi liðinu upp.

5. Coventry City - Vöktu mikla athygli í bikarnum á síðasta tímabili. Eru með ansi flotta sóknarlínu með Brandon Thomas-Asante, Haji Wright, Ephron Mason-Clark og Ellis Simms.

6. Norwich City - Það eru nýir tímar hjá Norwich þar sem hinn danski Johannes Thorup, fyrrum stjóri Nordsjælland, er tekinn við liðinu.

7. Sheffield United - Áttu skelfilegt tímabil í ensku úrvalsdeildinni og það verður verðugt verkefni fyrir hinn geðþekka Chris Wilder að endurræsa sitt lið.

8. West Bromwich Albion - Spánverjinn Carlos Corberan er spennandi stjóri en það verður strembið verkefni fyrir hann að koma West Brom í umspil.

9. Bristol City - Það má búast við bætingu á Bristolmönnum undir stjórn Englendingsins unga Liam Manning.

10. Sunderland - Síðasta tímabil voru mikil vonbrigði fyrir Sunderland en þá hafnaði liðið í sextánda sæti. Liðið hefur spennandi unga leikmenn innanborðs, eins og Jobe Bellingham bróðir Jude.

11. Sheffield Wednesday - Ráðningin á Þjóðverjanum unga Danny Röhl í fyrra reyndist algjör snilld hjá miðvikudagsmönnum og hefur búið til spennu og eftirvæntingu fyrir komandi tímabil.

12. Hull City - Hafa tekið algjöra stefnubreytingu með ráðningu á Tim Walter sem var þekktur fyrir ákafan sóknarbolta með Hamburg í Þýskalandi.

13. Swansea City - Ættu að spila áhorfsvænan fótbolta en varnarleikurinn gæti orðið hausverkur. Meðal áhugaverðra leikmanna er slóvenski sóknarmaðurinn Zan Vipotnik sem kom frá Bordeaux.

14. QPR - Gengi liðsins batnaði gríðarlega á síðasta tímabili þegar Spánverjinn Martí Cifuentes, sem var með Hammarby, var ráðinn til starfa.

15. Stoke City - Náðu að bjarga sér frá falli á síðasta tímabili með öflugum lokaspretti. Mikill léttir fyrir stuðningsmenn.

16. Cardiff City - Frekar illa samsettur hópur. Þurfa að fá meira út úr Aaron Ramsey.

17. Preston North End - Komu á óvart með því að enda í tíunda sæti á síðasta tímabili og það verður erfitt að fylgja því eftir. Íslenski landsliðsmaðurinn Stefán Teitur Þórðarson er kominn til Preston og verður spennandi að fylgjast með honum.

18. Millwall - Eru með gæði til að halda sér frá fallbaráttu en það verður erfitt að ná sama árangri og í fyrra þegar liðið hafnaði í þrettánda sæti.

19. Watford - Gæti orðið erfitt tímabil fyrir Watford. Ef liðið fer illa af stað verður Tom Cleverley ekki lengi í starfi, þannig virka hlutirnir hjá Watford.

20. Oxford United - Gerðu frábærlega með því að vinna Bolton í umspili C-deildarinnar og nú bíður það erfiða verkefni að halda sér í Championship.

21. Derby County - Náðu því ætlunarverkefni að komast aftur upp, þó það hafi ekki verið þægileg sigling. Þurfa að gera meira á leikmannamarkaðnum.

22. Portsmouth - Gleðin braust út þegar Portsmouth vann C-deildina og komst loksins aftur upp. En það er hætta á að liðið fari rakleiðis niður aftur.

23. Blackburn Rovers - Blackburn þarf á því að halda að Arnór Sigurðsson haldist heill og sýni sínar bestu hliðar. Síðasta tímabil var erfitt og þetta gæti orðið enn erfiðara.

24. Plymouth Argyle - Wayne Rooney og Guðlaugur Victor Pálsson eru sameinaðir á ný. Plymouth endar þó í neðsta sæti samkvæmt þessari spá.