Sameiginlegt byrjunarlið Fram og KR

---

Í markinu stendur Viktor Freyr Sigurðsson sem var frábær á síðasta tímabili en aðeins hefur dregið undan honum á núverandi tímabili. Engu að síður frábær markvörður og hefur betur í samkeppninni við Halldór Snæ Georgsson.

Kennie Chopart er einn þriggja hafsentana og þarf að sætta sig við að vera aðeins aftar á vellinum í þetta sinn. Með honum er liðsfélagi hans Þorri Stefán Þorbjörnsson og Finnur Tómas Pálmason.

Sigurjón Rúnarsson, miðvörður Fram, gerði tilkall í liðið en þarf að sætta sig við bekkjarsetu í þetta sinn. Sama má segja um Ástbjörn Þórðarson sem hefði getað farið hægra megin í vörnina og Chopart gæti farið upp í hægri vængbakvarðarstöðuna sem hann þekkir vel.

Það verður hart barist á miðjunni og þar eru þrír duglegir saman komnir. Hrafn Tómasson er aftastur en hann hefur verið frábær á tímabilinu. Þar fyrir framan eru þeir Arnór Ingvi Traustason og Freyr Sigurðsson.

Fyrrum KR-ingurinn, Ægir Jarl Jónasson, hefur verið frábær á miðjunni hjá Fram í sumar og er hann einn af fyrstu mönnum inn af bekknum.

Á köntunum tveimur eru þeir Luke Rae og Aron Sigurðarson. Aron eflaust auðveldasta val liðsins en honum er ýtt út á kant til að koma Fred Saravia inn í holuna.

Jason Daði Svanþórsson hefur ekki komið nægilega mikið við sögu hjá KR til þess að fá kallið. En leikmaður af hans gæðaflokki gerir svo sannarlega tilkall í liðið.

Eiður Gauti Sæbjörnsson leiðir línuna og hefur þar betur gegn Atla Þór Jónassyni, fyrrum samherja sínum í HK, í samkeppni um fremstu stöðuna.