Á leið á Anfield með Lille í Meistaradeildinni
Hákon Arnar Haraldsson.
Hákon er frábær fótboltamaður.
Hákon stefnir á stóra hluti í framtíðinni en hann dreymir um stórmót og ensku úrvalsdeildina.
Landsliðsmaðurinn Hákon Arnar Haraldsson er kominn aftur á fullt eftir meiðsli. Hann endaði síðasta ár af miklum krafti eftir að hafa glímt við erfið meiðsli.
Hákon er gríðarlega hæfileikaríkur leikmaður sem er búinn að finna taktinn í Frakklandi. Stuðningsmenn Lille eru mjög hrifnir af honum og eru einhverjir þeirra á samfélagsmiðlum að líkja honum við Eden Hazard, fyrrum leikmann liðsins.
Hákon er gríðarlega hæfileikaríkur leikmaður sem er búinn að finna taktinn í Frakklandi. Stuðningsmenn Lille eru mjög hrifnir af honum og eru einhverjir þeirra á samfélagsmiðlum að líkja honum við Eden Hazard, fyrrum leikmann liðsins.
„Ég er búinn að vera meiðslafrír síðan ég brotnaði í haust. Ég hef verið mjög góður síðan það kláraðist," segir Hákon í viðtali við Ingvar Örn Ákason hjá Livey sem má sjá í spilaranum hér að ofan.
Hákon er á sínu öðru tímabili með Lille og er búinn að venjast lífinu í Frakklandi.
„Þetta er svolítið öðruvísi, maturinn og kúltúrinn. Það er eiginlega enginn hérna sem talar ensku. Maður er búinn að læra þessi helstu orð til að geta farið í búðina og svona. Ég er ekki alveg kominn með frönskuna og veit ekki hvort ég muni nokkurn tímann ná henni. Ég kann flestu orðin í fótboltafrönskunni. Mér finnst þetta fáránlega erfitt tungumál."
Hann segir það mikinn mun á því að vera leikmaður FC Kaupmannahafnar og Lille.
„Þetta er mun stærra hérna, stærri deild. Við förum alltaf á hótel fyrir hvern einasta leik, líka í heimaleikjum. Í FCK mættum við einum og hálfum tíma fyrir leik. Stærðin á öllu hérna, það er allt risastórt og allt til alls," segir Hákon.
Fara á Anfield
Hákon hefur verið að fá gott hlutverk í liði Lille en framundan eru spennandi leikir þar sem hann og hans félagar takast meðal annars á við Liverpool á Anfield. Sá leikur er í Meistaradeildinni þar sem Lille hefur verið að spila vel.
„Þetta er einn erfiðasti útivöllur í heimi og besta lið í Evrópu eins og staðan er núna. Þetta er mjög spennandi og margir af vinum mínum eru einmitt Liverpool menn. Ég veit ekki með hverjum þeir ætla að halda. Það kemur í ljós. Það er mjög spennandi að spila á móti svona stóru félagi."
Hákon segir að vinir sínir séu duglegir að koma í heimsókn og kíkja á leiki. Hann fékk skemmtilega beiðni frá einum vini síni fyrir stuttu.
„Einn vinur minn vill að ég taki (Darwin) Nunez treyjuna þegar ég spila á móti Liverpool. Það gæti alveg verið að ég geri það," sagði Hákon léttur.
Stóra markmiðið
Hákon er lykilmaður í landsliðinu og á sér þann draum að fara með íslenska landsliðinu á stórmót. Næsta verkefni er að reyna að komast á HM 2026 sem fer fram í Bandaríkjunum, Kanada og Mexíkó.
„Frá því maður var lítill þá hefur maður átt sér þann draum að fara með Íslandi á stórmót," segir Hákon.
„Stóra markmiðið er að ná EM eða HM áður en maður hættir."
„Við eigum alltaf að reyna að komast á stórmót, það þýðir ekkert annað. Riðillinn okkar fyrir HM 2026 er gríðarlega erfiður en þetta leggst vel í mig. Auðvitað er markmiðið að fara á mótið."
Í draumaheimi
Hákon hefur að undanförnu verið orðaður við félög í ensku úrvalsdeildinni. Hann var í lokin á viðtalinu spurður að því hvernig hann sæi fyrir sér næstu ár á sínum fótboltaferli.
„Ég á þrjú og hálft ár eftir hér, á nóg eftir hér. Ég á enn eftir að sýna mig meira," sagði Hákon.
„Svo er draumurinn alltaf að fara í Premier League og spila þar. Maður hefur alltaf fylgst með ensku deildinni og það er markmiðið."
Ertu að horfa til einhverra félaga þar?
„Ég veit það ekki. Ég held með Manchester United. Það var alltaf draumurinn þegar maður var krakki. Það er svo margt sem spilar inn í. Maður veit aldrei, en ef maður væri í draumaheimi..." sagði Hákon.
Allt viðtalið má sjá í spilaranum hér að ofan. Hægt er fylgjast með öllum leikjum hjá Hákoni í frönsku deildinni á Livey.is.
