Hjulmand fer til Atlético Madrid

Hjulmand er búinn að samþykkja fimm ára samning við Atlético og flýgur til spænsku höfuðborgarinnar í dag til að gangast undir læknisskoðun og skrifa undir samning.

Atlético greiðir í heildina um 45 milljónir evra fyrir miðjumanninn.

Hjulmand er 27 ára gamall og hefur verið mikilvægur hlekkur á miðjunni hjá Sporting CP og danska landsliðinu undanfarin þrjú ár.

Hann er mikill stuðningsmaður Arsenal og er með Arsenal húðflúr á öxlinni. Hann er stór aðdáandi Patrick Vieira, fyrrum fyrirliða Arsenal sem starfaði síðast sem aðalþjálfari Genoa í Serie A.

Hjulmand hefur meðal annars verið orðaður við Arsenal, Manchester City og Tottenham í fortíðinni. Hann á tvö ár eftir af samningi sínum við Sporting og ætlar ekki að endurnýja við portúgalska stórveldið.