England: Chelsea fékk skell gegn Sheffield United

Nýliðar Sheffield United unnu Chelsea nokkuð örugglega, 3-0, á Bramall Lane í 35. umferð ensku úrvalsdeildarinnar í dag. Dýrt tap hjá Chelsea í baráttunni um Meistaradeildarsæti.

David McGoldrick kom Sheffield United yfir á 18. mínútu eftir að Kepa Arrizabalaga varði skot frá Oli McBurnie út í teiginn. Þetta var fyrsta mark McGoldrick í ensku úrvalsdeildinni og jafnframt fyrsta deildarmark hans síðan í apríl á síðasta ári í ensku B-deildinni.

Oli McBurnie bætti við öðru marki á 33. mínútu með skalla eftir laglega sókn heimamanna. Kepa stóð grafkyrr í markinu og Sheffield United komið í 2-0.

McGoldrick gerði annað mark sitt í deildinni á 77. mínútu. Hann lagði boltann á Lys Mousset sem kom boltanum á Ben Osborn. Antonio Rüdiger reyndi að verjast en það vildi ekki betur til en að boltinn endaði hjá McGoldrick sem skoraði örugglega.

Lokatölur 3-0 fyrir Sheffield United og liðið í 6. sæti með 54 stig og baráttan um Evrópudeildarsæti á lífi. Chelsea, sem er í 3. sæti, tapaði þarna mikilvægum stigum í baráttunni um Meistaradeildarsæti en bæði Manchester United og Leicester eiga leik inni.l