Magnús Már Einarsson, þjálfari Aftureldingar.
Úr leik hjá Aftureldingu í sumar.
„Á lykilmómentum verjumst við ekki nógu vel. Það á ekki bara við um varnarlínuna, heldur bara liðið í heild. Við erum ekki að setja pressu á boltann, erum að fá boltann aftur fyrir okkur, erum illa stilltir í línunni og ekki nógu grimmir. Það fer með þennan leik," sagði Magnús Már Einarsson, þjálfari Aftureldingar, eftir 0-3 tap gegn Þór í Lengjudeildinni í dag.
Lestu um leikinn: Afturelding 0 - 3 Þór
„Fyrstu 20 mínúturnar eru bæði lið að skapa sér færi og við öllu líklegri ef eitthvað er. Þeir fá mjög ódýra vítaspyrnu sem er aldrei vítaspyrna og þeir komast í 1-0. Það getur gerst en þessi mörk númer tvö og þrjú, ég er ógeðslega óánægður með þau. Eftir það verjast Þórsarar vel og við náum ekki að skapa okkur mikið."
Þórsarar komust yfir með marki úr vítaspyrnu en Maggi var ekki sáttur við þann dóm.
„Pétur leyfir mikla hörku eins og sást í dag. Ég fatta ekki hvernig hann fékk víti úr þessu. Þetta er mjög úr karakter hjá honum sem dómara. Hann sem gamall varnarmaður hefði verið trylltur ef hann hefði fengið þetta víti á sig."
„Það fór samt ekki með leikinn. Við skorum ekki og við þurfum að líta inn á við, og gera betur. En það hjálpaði okkur ekki að þetta víti var dæmt."
Staðan var 0-3 í hálfleik og Maggi tók hárblásara í hálfleik. Hann tók svo þrefalda skiptingu.
„Já, algjörlega. Það er eitt að fá á sig mörk en þegar menn eru einhvern veginn áhorfendur í mörkunum, það er bara ekki hægt. Að sjálfsögðu lét ég menn heyra það. Ég hefði getað gert fleiri breytingar. Við hefðum allir getað gert betur í fyrri hálfleik."
Þetta er annar leikurinn í röð sem Afturelding tapar 3-0 en liðið hefur tapað fjórum af síðustu fimm leikjum sínum. Mosfellingar eru í níunda sæti, fjórum stigum fyrir ofan fallsvæði.
„Við erum miklu betra lið en við sýndum í dag og í síðasta leik. Við þurfum að kafa mjög djúpt og finna okkar eðlilegu spilamennsku. Ég sé á æfingu í hverri viku hversu góðir við erum og ég hef séð það í fullt af köflum í sumar. Við þurfum að framkalla það oftar og ekki gleyma okkur á lykilaugnablikum. Við þurfum að laga það og gera það strax."
„Við þurfum að fara að vinna leiki, það er augljóst. Við þurfum að gera betur. Það er ekki þannig að þetta hafi verið svartnætti í 90 mínútur í öllum þessum leikjum. Alls ekki. Það hafa verið fínir spilkaflar en við þurfum að hafa þá lengri og við þurfum að standa það af okkur þegar hin liðin eru að sækja. Við þurfum að verjast betur sem lið. Ég er fullviss um að það sé bullandi trú í strákunum. Liðsheildin er það öflug að ég er viss um að við munum snúa þessu en við þurfum að gera það hratt."
Hægt er að sjá allt viðtalið í spilaranum hér að ofan.
