Arsenal fundar með úrvalsdeildinni um mögulega frestun

Að minnsta kosti tólf leikmenn gætu verið fjarverandi í leiknum en samkvæmt reglum ensku úrvalsdeildarinnar getur leik verið frestað ef lið getur ekki teflt fram þrettán útispilurum og markverði.

Arsenal skoðar hvort félagið geti farið fram á frestun.

Arsenal gerði markalaust jafntefli gegn Liverpool í fyrri viðureign liðanna í undanúrslitum deildabikarsins í gær. Í þeim leik vantaði meðal annars fjóra leikmenn vegna Afríkukeppninnar, Granit Xhaka fékk rautt og verður í banni á sunnudag og þá fengu Cedric Soares og Bukayo Saka högg.

Martin Ödegaard var eini leikmaðurinn sem var fjarverandi vegna Covid. Ákvörðun um frestun gæti komið í ljós eftir niðurstöðu úr skimunum innan leikmannahóps Arsenal í dag.

Þess má geta að Eric Dier verður ekki með Tottenham í leiknum á sunnudag vegna vöðvameiðsla.