Besta deildin: Titilbaráttan gæti ráðist á laugardag

Nýkrýndir bikarmeistarar Breiðabliks unnu 3-1 sigur á Fram í efri hluta Bestu deildar karla í Úlfarsárdalnum í kvöld. Þar með er Fram svo gott sem úr titilbaráttunni og getur Víkingur orðið meistari með sigri á KR á laugardag.

Blikar urðu bikarmeistarar um helgina og engin merki voru um hina svokölluðu bikarþynnku.

Fátt var um fína drætti fyrstu 25 mínúturnar og lítið sem ekkert að gerast í leiknum, en það breyttist á 30. mínútu.

Fyrirgjöf kom frá hægri sem Kennie Chopart ætlaði að skalla frá, en hann hitti boltann illa og stýrði honum í eigið net. Afar klaufalegt mark.

Blikar tvöfölduðu forystuna undir lok hálfleiksins. Davíð Ingvarsson kom boltanum á Gabríel Snæ Hallsson sem hitti hann þannig að hann tók furðulegt flug og hafnaði í bláhorninu. Þetta var í raun fyrsta alvöru marktilraun Blika í leiknum.

Sérstakur fyrri hálfleikur en Framarar komu grimmir út í þann síðari og minnkuðu muninn á 49. mínútu. Kristófer Konráðsson átti laglega fyrirgjöf sem Róbert Hauksson mætti og stýrði í netið af stuttu færi.

Framarar héldu áfram að sækja og leituðu að jöfnunarmarkinu en fengu þess í stað þriðja markið á sig á 66. mínútu. Blikar fengu hornspyrnu, boltinn gekk á milli manna inni á teignum og endaði hjá Ásgeiri Helga Orrasyni sem setti hann í netið.

Heimamenn reyndu hvað þeir gátu síðustu tuttugu mínúturnar en náðu ekki að nýta færin og 3-1 sigur Breiðabliks varð niðurstaðan.

Fram er í 3. sæti með 45 stig, ellefu stigum á eftir toppliði Víkings, en Breiðablik er í 4. sæti með 33 stig.

Úrslitin þýða jafnframt að Víkingur getur tryggt sér Íslandsmeistaratitilinn þegar liðið heimsækir KR á Meistaravelli á laugardag.