England: Tottenham hafði betur gegn Sheffield

Botnlið Sheffield United tók á móti Tottenham og lenti undir strax á fimmtu mínútu þegar Serge Aurier skallaði fyrirgjöf Son Heung-min í netið.

Liðin skiptust á að sækja í kaflaskiptum leik og var gæðamunur liðanna augljós þegar komið var að síðasta vallarþriðjunginn. Leikmenn Sheffield komust nokkrum sinnum í ákjósanlegar stöður en tóku rangar ákvarðanir.

Harry Kane tvöfaldaði forystu Tottenham fyrir leikhlé og minnkaði David McGoldrick muninn fyrir heimamenn í síðari hálfleik með skalla eftir fyrirgjöf frá John Fleck.

Það liðu þó aðeins þrjár mínútur þar til gestirnir tvöfölduðu forystuna aftur, í þetta sinn skoraði Tanguy Ndombele stórglæsilegt mark úr ótrúlega erfiðu færi með tvo varnarmenn í sér.

Síðasti hálftími leiksins var þægilegur fyrir Tottenham sem vann sinn fyrsta útivallarsigur gegn Sheffield síðan 1975. Lærisveinar Jose Mourinho eru í fjórða sæti eftir sigurinn, þremur stigum eftir toppliði Man Utd sem á leik til góða.

Sheffield er áfram á botninum með fimm stig eftir nítján umferðir.