Hvaða lið fylgja KA og FH í undanúrslitin?

Í síðustu viku tryggðu KA og FH sér sæti í undanúrslitum Mjólkurbikarsins, með því að leggja neðri deildarliðin Ægi og Kórdrengi.

Hinir tveir leikirnir í 8-liða úrslitum verða spilaðir á morgun og föstudag, báðir í beinni á RÚV 2. Það verður stórleikur í Fossvogi annað kvöld þegar ríkjandi meistarar í Víkingi taka á móti KR.

Pétur Guðmundsson lögregluvarðstjóri dæmir þann leik og hefst hann klukkan 20.

Sólarhring síðar leika Kópavogsliðin HK og Breiðablik í Kórnum. HK er á toppi Lengjudeildarinnar en Breiðablik á toppi Bestu deildarinnar.

Undanúrslitin verða svo leikin 31. ágúst og 1. september. Úrslitaleikurinn verður svo laugardaginn 1. október á Laugardalsvelli.