Spánn: Cadiz vann óvæntan útisigur á Real Madrid

Real Madrid tapaði í kvöld sínum fyrsta deildarleik á þessu tímabili er liðið mætti Cadiz á æfingavelli sínum í dag.

Cadiz hafði byrjað tímabilið nokkuð vel og var með sjö stig eftir fyrstu fimm leiki sína.

Real var þó á toppnum með tíu stig en liðið tapaði aðeins stigum í fyrstu umferð gegn Real Sociedad í leik sem lauk með markalausu jafntefli.

Það bjuggust þó flestir við þægilegum heimasigri Real í dag en óhætt er að segja að það hafi ekki verið raunin.

Cadiz komst yfir eftir 16 mínútur er Anthony Lozano kom boltanum í netið og reyndist það nóg til að tryggja þeim gulklæddu sigur.

Cadiz er nýliði í efstu deild Spánar eftir að hafa tryggt sér sæti á síðustu leiktíð úr B-deildinni.