Meistaradeildarbaráttan á Ítalíu

Það er mikil spenna í Meistaradeildarbaráttunni í ítölsku Seríu A. Leikirnir sem liðin í 3.-8. sæti deildarinnar eiga eftir eru neðar í fréttinni ásamt markahæstu leikmönnum deildarinnar. Efstu fjögur liðin fá sæti í Meistaradeildinni á komandi leiktíð.

Juventus er löngu búið að klára efsta sætið en getur klárað það formlega um helgina. Napoli situr í öðru sæti, sautján stigum á eftir Juve og sjö stigum frá Inter. Inter er svo fimm stigum fyrir ofan Milan sem situr í fjórða sætinu.

Þar á eftir koma Roma, Atalanta, Lazio og Torino er í áttunda sætinu, aðeins fimm stigum á eftir Milan. Tveir topp átta slagir verða í umferðinni sem leikinn er á laugardag og mánudag. Inter mætir Roma í gífurlega þýðingarmiklum leik á laugardagskvöldið. Á mánudag mætast svo Napoli og Atalanta.

Deildin klárast sunnudaginn 26. maí og ljóst er að hörku barátta verður um allavega fjórða sætið. Ef Inter misstígur sig gegn Roma um helgina gæti baráttan snúist um þriðja og fjórða sætið.

Milan og Lazio mætast innbyrðis í bikarnum og Atalanta mætir Fiorentina. Þeir leikir eru í næstu viku og eru seinni leikir liðanna í undanúrslitum bikarsins. Napoli er í slæmri stöðu gegn Arsenal í Evrópudeildinni, 0-2 undir eftir fyrri leik liðanna á Emirates.

Öll liðin í 3.-8. sæti eiga eftir að mæta Juventus nema AC Milan. Það gæti skipt sköpum á endasprettinum. Milan á einungis eftir að mæta Torino af liðunum í kringum sig.

Sampdoria situr í níunda sætinu, tveimur stigum fyrir neðan Torino og ef allt gengur upp þar á liðið einnig möguleika á að troða sér í Meistaradeildina.