Emery: Strákarnir skráðu sig út á þriðjudaginn

Jean-Philippe Mateta setti þrennu og skoraði Eberechi Eze tvö í 5-0 sigri heimamanna. Unai Emery þjálfari segir að lærisveinar sínir hafi verið löngu búnir að skrá sig út andlega og komnir í sumarfrí.

„Það er smá vandræðalegt að tapa 5-0 en við vorum ekki uppá okkar besta í dag. Við kláruðum það sem við þurftum að klára í síðustu umferð, þegar við tókum á móti Liverpool á mánudaginn og strákarnir voru búnir að tékka sig út á þriðjudaginn. Markmið dagsins var að klára tímabilið með sigri en það gekk ekki hjá okkur, við spiluðum illa," sagði Emery eftir lokaflautið.

„Þetta var erfiður leikur útaf því að við mættum liði sem er að spila mjög vel þessa dagana og útaf því að strákarnir voru farnir í frí í huganum eftir síðustu umferð. Við reyndum að spila eins og við höfum verið að gera allt tímabilið en það gekk ekki í dag."

Nú hefst undirbúningsvinna fyrir næstu leiktíð en Emery segist ætla að taka sér nokkurra vikna frí fyrst. Hann þarf að hvíla sig eftir magnað tímabil sem tók mikið á.

Emery er elskaður og dáður eftir sitt fyrsta heila tímabil við stjórnvölinn hjá Aston Villa. Hann náði langþráðu meistaradeildarsæti með liðinu auk þess að komast í undanúrslit Sambandsdeildarinnar.