Meistaradeildin: Prinsinn sá Villa tapa í Mónakó

Vilhjálmur Bretaprins, prinsinn af Wales, sá sína menn í Aston Villa tapa í Mónakó í kvöld. Þetta var fyrsta tap Villa síðan nýtt ár gekk í garð.

Mónakó komst yfir úr sinni fyrstu sókn í leiknum. Thilo Kehrer, fyrrum leikmaður West Ham, átti skalla sem Emilíano Martínez varði en boltinn datt fyrir Wilfried Singo sem skoraði. Þetta reyndist eina mark leiksins.

Liðin eru jöfn að stigum, með 13 stig í sætum 7-9, og eiga möguleika á að komast beint í 16-liða úrslitin. Aston Villa mun mæta Celtic í lokaumferðinni og Mónakó leikur gegn Inter.

Á sama tíma þá rúllaði Atalanta yfir Sturm Graz. Evrópudeildarmeistararnir hafa verið að gera flotta hluti í Meistaradeildinni og eru sem stendur í þriðja sæti. Austurríska liðið hefur aðeins fengið þrjú stig og kemst ekki áfram úr deildarkeppninni.