Botna ekkert í pirringi Linta - „Verður þá meira upp í stúku en við hliðarlínuna“

„Þetta var stórskrítið, það var ekkert í gangi og hann rýkur í dómarann," segir Valur Gunnarsson í útvarpsþættinum Fótbolti.net þar sem rætt var um rauða spjaldið sem Aleksandar Linta þjálfari ÍBV fékk eftir tap gegn Val á föstudag.

Linta óð beint að Sigurði Hirti Þrastarsyni dómara eftir lokaflautið á Hlíðarenda þar sem Valur vann ÍBV 2-1. Rauða spjaldið fór á loft. Í stúkunni furðuðu menn sig á hegðun Linta enda var dómgæslan svo sannarlega ekki í aðalhlutverki í leiknum.

Linta verður í banni á morgun þegar ÍBV og KR mætast í Vestmanneyjum. Aðstoðarmaður hans Óskar Elías Zoega Óskarsson stýrir því liðinu frá hliðarlínunni.