„Það er frábært að vinna hérna þetta er erfiður útivöllur og Skaginn er með gott lið. Við vorum frábærir í fyrri hálfeik. Við vorum klaufar að loka leiknum ekki í lok fyrri hálfeiks. En Skaginn er þekktur fyrir það að koma til baka og þeir sýna alltaf mikinn karakter. Við mjötluðum þetta inn.“ sagði Heimir Guðjónsson, þjálfari FH-inga, eftir 2-1 sigur á ÍA í Akraneshöllinni í dag.
Lestu um leikinn: ÍA 1 - 2 FH
Það fóru mörg spjöld á loft í dag og magir óánægðir með dómgæsluna í dag. Heimir er hins vegar alls ekkert ósáttur með hana en setur spurningarmerki við nokkur atriði.
„Mér fannst dómgæslan í leiknum mjög góð. Eina spurningarmerkið mitt er að það var stundum farið fullhart í Sigga (Sigurð Bjart) stundum. Annars var bara hart tekist á og það er alltaf þannig þegar þú kemur hérna að þú verður að vera klár í baráttu og við vorum það. Þetta rauða spjald sem Ísak fær var kannski smá klaufalegt en ég ætla ekki að taka neitt af Ísak, frábær í dag.“
Það hefur verið mikið talað um Akraneshöllina og að það sé verið að spila í henni í Bestu deildinni en Heimir viðurkenndi það eftir leik að hann hefði frekar verið til í að spila úti á aðalvellinum.
„Nei það var sagt við okkur á miðvikudaginn að við ættum að spila hér þá bara tökum við því og mætum hérna. Ég viðurkenni það samt að þegar ég kom hérna í hádeginu að ég hefði viljað spila hérna úti á aðalvellinum. Frábær umgjörð og geggjaður völlur en þetta var niðurstaðan og þá bara sættum við okkur við það.“
Bjarni Guðjón mætti í raðir FH á láni á dögunum. Hver var ástæðan á bakvið sú skipti.
„Hann kemur bara til með að styrkja miðsvæðið. Ég talaði við minn mann á Akureyri, Pál Gíslason, og hann mælti með honum. Allt sem að Palli segir er satt og rétt. Hann er bara búinn að mæta á þrjár æfingar. Við þurfum bara að setja hann meira inn í hlutina og þá getur hann hjálpað okkur meira í framhaldinu.“
Næsti leikur hjá FH er á heimavelli gegn Vestra en verður hann spilaður á Kaplakrikavelli?
„Já ég var að tala við yfirmann knattspyrnumála (Davíð Viðarsson) á föstudaginn og hann lofaði mér því að þessi leikur væri spilaður á grasvelli. Núna þegar næturfrostið hætti þá sprettur hann upp og ég held að hann verður klár eftir viku.“
En var eitthvað í dag sem FH-liðið hefði mátt gera betur í dag eða tekur Heimir eitthvað sérstakt jákvætt úr leiknum?
„Þetta er einhver erfiðasta spurning sem ég hef fengið í langan tíma. Það er neikvætt að við náðum ekki að loka þessum leik. Síðan voru forsendur að við hefðum getað spilað betur í seinni hálfleik. En það jákvæða er að við sýndum karakter og héldum áfram og kláruðum þetta.“ sagði Heimir Guðjónsson, þjálfari FH, að lokum eftir 2-1 sigur á ÍA í dag.
Viðtalið má sjá í heild sinni í spilaranum hér að ofan.
