Þýskaland: Havertz tryggði annan sigur - Kominn með 35 mörk

Freiburg tók á móti Bayer Leverkusen í fyrsta leik 29. umferðar þýsku deildarinnar. Bæði lið eru í sitthvorri baráttunni um Evrópusæti, þar sem Freiburg berst um Evrópudeildina og Leverkusen um Meistaradeildina.

Fyrri hálfleikur var vægast sagt hundleiðinlegur þar sem fimm skot litu dagsins ljós og rataði ekki eitt einasta þeirra á rammann.

Ungstirnið Kai Havertz skoraði snemma í síðari hálfleik eftir frábæran samleik við Leon Bailey. Havertz bætti þannig sitt eigið met sem markahæsta ungstirni í sögu Bundesliga.

Havertz er núna kominn með 35 mörk fyrir 21. afmælisdaginn, sem er 19. júní.

Heimamenn tóku við sér eftir markið og komust nálægt því að jafna en knötturinn rataði ekki í netið.

Gestirnir frá Leverkusen stóðu uppi sem sigurvegarar í afar bragðdaufum leik þar sem einstaklingsgæði Havertz og Bailey gerðu gæfumuninn.

Í heildina rötuðu tvö skot á rammann í öllum leiknum.