Trent Alexander-Arnold snýr aftur eftir meiðsli

Stefan Bajcetic og Thiago Alcantara eru einnig fjarri góðu gamni vegna meiðsla en aðrir leikmenn eru við fulla heilsu, þar með talinn Joe Gomez sem missti af endurkomusigrinum gegn Leicester City í miðri viku. Curtis Jones byrjaði í hægri bakverði í fjarveru Gomez og Trent.

„Við eigum eftir að taka ákvörðun varðandi Trent en það lítur út fyrir að hann geti spilað. Annars eru bara Stefan og Thiago meiddir, aðrir leikmenn liðsins eru klárir í slaginn," sagði Klopp, sem var svo spurður út í nýju peningana sem eru komnir inn í félagið eftir að Fenway Sports Group seldi lítinn hlut í Liverpool til Dynasty Equity fyrir rúmlega 100 milljónir punda.

„Þessir peningar munu ekki fara í nýja leikmenn þó að ég skilji vilja stuðningsmanna til að bæta liðið með nýjum fótboltamönnum. Við þurfum að huga að öðrum hlutum, við erum að byggja nýja stúku sem mun bæta andrúmsloftið á Anfield og erum komnir með nýtt æfingasvæði. Auk þess keyptum við Melwood (gamla æfingasvæðið) til baka. Þetta eru allt hlutir sem munu hjálpa félaginu ómælanlega mikið á komandi árum og vonandi áratugum.

„Við þurfum að samþykkja alla þá hjálp sem býðst eftir að við misstum af Meistaradeildinni. Það er högg fyrir félagið fjárhagslega að missa af Meistaradeild Evrópu en okkur tókst samt að styrkja okkur í sumar sem eru frábærar fréttir. Þessir peningar verða notaðir í mikilvægt uppbyggingarstarf innan félagsins."

Liverpool er í öðru sæti ensku úrvalsdeildarinnar sem stendur, með 16 stig úr 6 umferðum, tveimur stigum eftir toppliði Manchester City.