Skýrist í dag hvort Haaland geti spilað gegn Liverpool

Á fundinum kom einnig í ljós að Phil Foden verður frá í um þrjár vikur en hann gekkst undir botnlangaaðgerð á sunnudag.

„Erling er á batavegi. Við æfum og sjáum hvernig staðan er. Læknarnir og leikmaðurinn munu sjá hvernig þetta fer," segir Guardiola.

Hann var þá spurður að því hvort hann væri tilbúinn að taka áhættu með því að spila honum tæpum?

„Lífið er áhætta. Á þessu stigi verðum við að taka áhættur."

Haaland kom til City frá Borussia Dortmund í júní en hann hefur skorað 42 mörk í 37 leikjum á þessu tímabili, þar af 28 í 26 úrvalsdeildarleikjum. City er átta stigum á eftir toppliði Arsenal í ensku úrvalsdeildinni.