„Mjög sætt, fyrsti leikur á móti liði sem var spáð ofarlega og féll í fyrra, virkilega vel gert hjá strákunum," sagði Árni Freyr Guðnason þjálfari ÍR eftir sigur liðsins gegn Keflavík í fyrstu umferð Lengjudeildarinnar í kvöld.
Lestu um leikinn: Keflavík 1 - 2 ÍR
„Mér fannst þeir öflugir. Þeir eru með marga góða leikmenn, heilt yfir gott lið en held að við séum góðir líka," sagði Árni.
Vilhelm Þráinn Sigurðarson átti frábæran leik á milli stanganna hjá ÍR í kvöld.
„Villi var flottur í dag. Hann er búinn að standa sig vel hjá okkur. Hann spilaði hjá okkur í fyrra og er markmaður númer eitt og er bara hrikalega góður," sagði Árni.
Stuðningsmenn ÍR fjölmenntu til Keflavíkur og létu vel í sér heyra.
„Þetta eru alvöru menn, Gettóhuligans, þeir eru til í allskonar stemningu. VIð erum ekki á heimavelli en stuðningurinn var eins og við værum á heimavelli. Það hjálpaði okkur gríðarlega mikið og ég vona að þeir bæti í," sagði Árni.