Köln er svo gott sem fallið úr þýsku deildinni eftir að liðið gerði markalaust jafntefli við Freiburg í dag.

Það er ekkert launungarmál að Köln þurfti öll stigin í dag og gerði liðið allt sem það gat til að ná í þau.

Liðið skapaði sér mörg ákjósanleg færi en Noah Atubolu, markvörður Freiburg, var í stuði og varði allt sem kom í áttina að honum.

Köln hefur aðeins skorað 24 mörk á öllu tímabilinu og sást það oft á færanýtingunni.

Þetta jafntefli gerir lítið fyrir bæði lið. Köln er sex stigum frá öruggu sæti þegar liðið á tvo leiki eftir á meðan Freiburg varð af mikilvægum stigum í Evrópubaráttu.

Það er fátt sem kemur í veg fyrir fall Kölnar. Það gæti gerst á morgun ef Union Berlín og Bochum gera jafntefli en þá þyrfti Mainz að vinna Heidenheim.